لقێ ئێك:
ل گۆر بهرنامێ لقێ ئێك یێ خهلاتكرنا كهسانێن بسپور و رێكخراو و سازیێن چالاك ل روژا ئێك شهمبى رێكهفتى 25/7/2010 د رێورهسمهكێ تایبهت دا ل بارهگایێ لقێ ئێك رێزدار سهربهست لهزگین بهرپرسێ لقێ خهلاتێ شانازیێ یێ تایبهت ب لقێ ئێكێ پارتى دیموكراتى كوردستان ڤه، پێشكێشى سینهماكارێ كورد (شهوكهت ئهمین كوركى) كر.
د روونشتنهكێ دا بهرپرسێ لقێ ئێك ب گهرمى پێشوازى ل سینهماكارێ ناڤهاتى كر و رولێ وى د هونهرێ سینهمایا كوردى دا بلند نرخاند و دیار كر كو هونهرێ سینهمایێ گرنگیهكا مهزن ههیه، نهخاسمه بۆ گههاندن و بهرچاڤكرنا ئێش و ئازارێن گهلێ كورد و د ڤى بیاڤى دا فلمێن كوردى ب تیرهكا ژههراوى بۆ سینگێ دوژمنى وهسف كر و هیڤیا بهردهوامیێ و سهركهفتنێ بوو خواست.
د تهوهكێ دى دا بهرپرسێ لقێ بهحسێ رهوشا هونهرێ سینهمایێ ل كوردستانێ و ئهو پێشڤهچونێن بخوڤه دیتین كر و ئاماژه ب پویتهدانا حكومهتا ههرێما كورستانێ كر بو پێشڤهبرنا بیاڤێ هونهرى .
ژ لایێ خوڤه شهوكهت ئهمین گوت :( سوپاسیا لقێ ئێك دكهم كو ئهز ژ ههژى دیتیم بۆ وهرگرتنا ڤى خهلاتى و دیاره ئهڤ خهلاته دێ پتر بیته پالدهرهكێ مهعنهوى بو ئهنجام دانا بهرههمێن باشتر و دوپات دكهم كو ههمى هێز و شیانێن خو بمهزێخم بو پێشئێخستنا بوارێ سینهمایا كوردى و دانهنیاسینا وێ ل ههموو جیهانێ).
سینهماكارێ كورد (شهوكهت ئهمین كوركى ) شیایه ب بهرههمێن خویێن سینهمایى پشكداریێ د 60 فیستهڤالێن جیهانى دا بكهت و 21 خهلاتێن نێڤدهولهتى بدهستڤه ئیناینه.
|
