نووترين نووچه
دەستپگ / گووتار / بۆ سه‌رخوه‌بوونێ چاڤه‌رێ چ كه‌سه‌كێ نه‌بن

بۆ سه‌رخوه‌بوونێ چاڤه‌رێ چ كه‌سه‌كێ نه‌بن

هۆشه‌نگ تاجر
19250880_1430312920362757_1168456214_nپشتی كو ب سه‌رۆكاتیا سه‌رۆكێ هه‌رێما كوردستانێ رۆژا ٢٠١٧/٩/٢٥ وه‌كو رۆژا ریفراندۆمێ ل هه‌رێما كوردستانێ هاتیه‌ دیار كرن

 

وه‌لاتێن داگیركه‌رێن كوردستانێ هه‌ر زوو دژبه‌ریا خوه‌ ل هه‌مبه‌ر ڤێ یه‌كێ دیار كرن، ئه‌ڤه‌ ژی تشته‌كێ سروشتیه‌ و چاڤه‌رێ چو هه‌لویسته‌كێ جوداتر ژ وان وه‌لاتان نه‌دهاته‌ كرن، لێ خالا سه‌یر ئه‌ڤه‌ كو هنده‌ك ده‌زگه‌هێن راگه‌هاندنا كوردی دێ ڤی بابه‌تی وه‌سا دیار بكه‌ن كو هه‌كه‌ توركیا و ئیران پشته‌ڤان نه‌بن كورد نه‌شێن ریفراندۆمێ بكه‌ن. ئه‌ڤه‌ ژی شاشیه‌كا مه‌زنه‌.

ده‌مێ كو نه‌مر مه‌لا مسته‌فایێ بارزانی ده‌ست ب شۆره‌شێ كری چاڤه‌رێ پشته‌ڤانیا چو وه‌لاته‌كێ نه‌بوو و ب ئیرادا خوه‌ و گه‌لێ كوردستانێ ده‌ست ب شۆره‌شێ كر و هه‌تا ئه‌ڤرۆكه‌ ژی شۆره‌شا وی یا به‌رده‌وامه‌، ڤێجا بۆچی دڤێت ئه‌م ئه‌ڤرۆكه‌ چاڤه‌رێ هندێ بین كو هنده‌ك وه‌لاتێن داگیركه‌رێن كوردستانێ پشته‌ڤانێ مه‌ بن و هه‌كه‌ ئه‌و پشته‌ڤان نه‌بن ئه‌م نه‌شێین ده‌وله‌تا خوه‌ راگه‌هینین؟ ده‌وله‌تا كوردی دێ ب ئیرادا سه‌رۆكێ كوردستانێ و گه‌لێ كوردستانێ هێته‌ راگه‌هاندن و ئه‌ڤرۆكه‌ ژی ئه‌ڤ بریار هاتیه‌ دان و یێن كو خوه‌دان ئه‌و ئیراده‌ نه‌بن و نه‌شێن ببنه‌ پشكه‌ك ژ ڤێ شانازیا دیرۆكی بلا ئاسته‌نگیان ژی دروست نه‌كه‌ن.

ئه‌ڤرۆكه‌ ئه‌م به‌ر ب ئاڤاكرنا وێ خه‌ونا خوه‌ دچین یا كو هه‌تا نها ب سه‌د هزاران شه‌هیدان جانێ خوه‌ بۆ وێ خه‌ونێ كریه‌ قوربانى، راسته‌ ل كوردستانێ گه‌له‌ك ئالۆز هه‌نه‌، قه‌یران هه‌نه‌ و گه‌نده‌لی ژی هه‌یه‌ لێ ئه‌ڤه‌ هه‌موو نابنه‌ به‌هانه‌ كو ئه‌م چاڤه‌رێ بین هه‌تا گه‌نده‌ل ده‌ستان ژ گه‌نده‌لیێ به‌رده‌ن دا پاشی ده‌وله‌تا خوه‌ راگه‌هینین، چونكو بابه‌تێ سه‌رخوه‌بوونا كوردستانێ گه‌له‌ك ژ هندێ مه‌زنتره‌.
هه‌لویستێ هنده‌ك وه‌لاتێن ئورۆپا ب تایبه‌تی ژی یێ ئه‌لمانیا توند بوو و ئه‌و یه‌ك ژی نیشا دده‌ت كو وان ژ به‌ر به‌رژوه‌ندیێن ئابووری یێن ل گه‌ل عیراقێ ناخوازن كورد جودا ببن، لێ دڤێت ئه‌م باش بزانین كو مه‌ چو رێیه‌كا دی ژ بلی سه‌رخوه‌بوونێ نه‌مایه‌، ئه‌م نه‌شێین چاڤه‌رێ هندێ بین كو پشتی عبادی كه‌سه‌كێ دی ببیته‌ سه‌رۆك وه‌زیر و ئه‌م ژی دوعا بكه‌ین دا سه‌رۆكێ نوو یێ عیراقێ نانێ مه‌ نه‌بڕیت، ب ڤی ره‌نگی ئه‌م نه‌شێین ل گه‌ل عیراقێ به‌رده‌وام بین، ژ به‌ر هندێ ژی بریارا سه‌رۆكێ كوردستانێ و سه‌ركردایه‌تیا سیاسی ل دۆر ریفراندۆمێ دیرۆكی یه‌ و بلا ئه‌م وه‌كو هه‌ر تاكه‌كێ كوردستانێ خوه‌ ژ ڤێ پێنگاڤا پیرۆز بێ بار نه‌كه‌ین و ب دل و جان پشته‌ڤانیێ لێ بكه‌ین.
شه‌رمزاریه‌كا مه‌زنه‌ ئه‌ڤرۆكه‌ هنده‌ك كه‌س ل كوردستانێ دژبه‌ریا سه‌رخوه‌بوونێ بن، بلا هزار كێماسی ل وه‌لاتێ مه‌ هه‌بن لێ بلا وه‌لاتێ من یێ ئازاد بیت. پشتی كوردستان وه‌كو ده‌وله‌ت ب فه‌رمی ل جیهانێ هاته‌ نیاسین وی ده‌می ئه‌م دشێین شه‌ری بۆ دیموكراسی كرنا جڤاكێ كوردی و گه‌له‌ك تشتێن دی بكه‌ین، لێ ئه‌و یه‌ك نابیته‌ به‌هانه‌ نها هنده‌ك كه‌س ل گۆر دلێ داگیركه‌رێن كوردستانێ بئاخڤن.
ل دووماهیێ دێ بێژم گه‌له‌ك وه‌لات ل جیهانێ هه‌نه‌ كو وه‌كو هه‌رێما كوردستانێ ژی ب هێز نینن و هه‌ژارن لێ ئازادن، ڤێجا بۆ سه‌رخوه‌بوون و ئازادیێ ئه‌م چاڤه‌رێ چ كه‌سه‌كێ نه‌بین، خوونا ب سه‌د هزاران شه‌هیدان مه‌زنترین پشته‌ڤانیه‌ بۆ ده‌وله‌تا كوردی و ئه‌ز باوه‌رم یێن نها دژبه‌ریا كوردستانێ بكه‌ن سبێدێ نه‌شێن ل هه‌مبه‌ر دایكێ شه‌هیدان سه‌رێ خوه‌ بلند بكه‌ن.

نەڤ بابەتە (16) جارا هاتيە خواندن

کومینت هاتیە گەرتن.

إلى الأعلى