نووترين نووچه
دەستپگ / دیدار / ميلازم كۆچه‌ر سالح: كچێ چه‌په‌رێن جڤاكى و داعش شكاندن

ميلازم كۆچه‌ر سالح: كچێ چه‌په‌رێن جڤاكى و داعش شكاندن

میلازم کوچەر سالح دۆسکی ل گەل چار برایێن خوە و بابێ خوە یێ خانە نشین ل چەپەرێن شەری بەرامبەر داعش راوەستایە، بەردەوام بوویە و کەفتیە د گەلەک کاودانێن مەترسیدار دا کو مرن لێ نێزیک بوویە و بۆ ئەڤرۆ دبێژیت: چ جوداھی د ناڤبەر مە و زەلامان دا نینە ل سەر بکارئینانا چەکی و مە ژی ھەموو جورێن چەکان بکار ئیناینە.
میلازم کوچەر سالح دۆسکی تایبەت بۆ ئەڤرۆ دبێژیت: (ل سالا2011 من پەیوەندی ب فەرماندا پێشمەرگێن زێرەڤانی کریە و ھاتیمە وەرگرتن و مە دەست ب راھێنانێن لەشکەری کر، ل سالا سالا 2015 ھاتیمە وەرگرتن ل کولیژا لەشکەری ل زاخۆ و دەمێ چوویمە چاڤ پێکەفتنێ بۆ مە ھاتە دیار کرن کو دەمێ جلکێن لەشکەری دکەیە بەر خوە چ جوداھی د ناڤبەرا تە و زەلامی دا نینە، ئەڤە د بوو ئێکەم خول ل رۆژھەلاتا ناڤین کو ژن ببیتە ئەفسەر و بووینە خودانێن باوەرناما بەکالوریوس ب زانستێن لەشکەری).
میلازم کوچەر سالح دۆسکی زێدەتر بۆ رۆژناما ئەڤرۆ گۆت: (ھەر ل دەستپێکا شەرێ داعش غیرەتا من قەبوول نەکر کو ھەڤالێن مە ل شەری بن و ئەم ل مال بین، مە پشکداری د شەرێ داعش دا کر و (3) برایێن من پێشمەرگە بوون و برایەکێ من خوبەخش بوو، و دیسا بابێ من ژی خانەنشین بوو پشکداری کر، د ھێرشا سەنتەرێ شنگال دا و دیسا دەمێ رێکا چیایێ شنگال ھاتیە ڤەکرن و دەڤەرا خانە سور ئەم پشکدار بووینە، دیسا گوندێن خازری و دووماھی شەر یێ (فازلیێ) بوو و ھەموو کچ پشکدار بوون و ھەموو یێن ھاتنێ بۆن و کەسەکێ نە دگۆت ئەز ناھێم).
میلازم کوچەر سالح دۆسکی کو سەر ب لقێ ئافرەتێن زێرەڤانیێ ڤەیە ئەو چەندە ژی گۆت: (چ جوداھی د ناڤبەر مە و زەلامان دا نینە ل سەر بکارئینانا چەکی و مە ژی ھەموو جورێن چەکان بکار ئیناینە، ئافرەت ل گەل مە ھەبووینە خودان خێزانن و بەرھەڤ بووینە زارۆیێن خوە بھێلنە مال و بھێنە شەری و وەک پێشمەرگێن ئافرەت کەفتینە چەپەران و ب شەڤ ھەتا سپێدێ و مە نەخوشی دیتی نە، ھەر دەرکەفتنەکا مە ل سەر سازیەکا راگەھاندنێ بۆیە ئەگەر کو پەیوەندیێن مە نە راوستن و رۆژانە ھەتا (20) پەیوەندیان بۆ مە دھێن ژ کچان و حەز دکەن ببنە پێشمەرگە و ھەتا کچێن خودان باوەرنامە و زانکو ب دووماھی ئینای، دیسا پەیوەندیێن ب فەرماندێن پێشمەرگەی دکەن و ئەڤە ل بن چەندین مەرجان دھێنە وەرگرتن و مفا ژ شیانێن وان دھێتە وەرگرتن).
میلازم کوچەر سالح ئەو ژی گۆت: (ب ھزاران دەست خۆشیی ژلایێ فەرماندێن پێشمەرگێ کوردستانێ ڤە بۆ مە ھاتینە و ھەتا شەرێ خازر و گوێر دەمێ ئەم ماینە وێرێ ل گەل ھێزێن (ئەحمەد) ماینە ھەتا سپێدێ و فەرماندە (منێور بارزانی) سەرەدانا مە کریە ل گەل پێشمەرگێن زەلامین و داعش ب دوورا تیا (200) مەتران ل دورێن مە بوو جھێ سەر سورمانێ بوو، دیسا ب ھزاران دەست خوشیی بۆ مە ھاتن و ئەڤە جھێ سەر فەرازیا مە ھەموو مللەتێ کورد بوو).
ڤێ کچا میلازم ئەو ژی گۆت: (ھیڤی دکەم خێزان ل گەل کچان د ھاریکار بن و بھێلن ئارەزویێن خوە و شیانێن خوە دیار بکەن، ژبەرکو ھەکە جڤاکێ ھاریکار بیت حوکمەت ھەر یا ھاریکارە، من چ جارا ماندیبوون د چەپەری دا نە دیتی یە بتنێ ماندیبوونا مە، وەک ئافرەتا کورد مە دو چەپەر شکاندینە ئێک یا داعش و ئێک یا جڤاکی).
ل داویێ کوچەرێ گۆت: (ب مخابنی ڤە سازیێن راگەھاندنێ وەک پێدڤی شیانێن مە و شیانێن کچا پێشمەرگە ل کوردستانێ دیار نەکرینە و ھندەک سازیێن راگەھاندنێ سەرکەفتن و پشکداربوونا وان دیار کرن کو شەرڤانێن رۆژئاڤانە پشکداری شەرەکی بووین.
جھێ ئاماژەکرنێ یە کو میلازم (کوچەر سالح بیری دۆسکی) ل ئوردیگایێ زێوە ل سالا 1990 ژ دایک بوویە، د شەرێ دژی تیرۆرستێن داعش دا مل ب ملێ پێشمەرگەی ڤە شەر کریە و رۆژێن تەناھیێ ژی بەردەوام بوویە سەر راھێنانێن خوە.

نەڤ بابەتە (24) جارا هاتيە خواندن

کومینت هاتیە گەرتن.

إلى الأعلى